THE CONTEST 2027

BEYNƏLXALQ İNGİLİS DİLİ OLİMPİADASI

AZƏRBAYCAN SEÇİM TURU

RƏSMİ TƏLİMAT

ENGLISH WITHOUT BORDERS

Global Olympiad Center — Azərbaycan üzrə rəsmi təşkilatçı

HIPPO — English Without Borders dünyanın müxtəlif ölkələrindən 6–19 yaşlı şagirdləri bir araya gətirən beynəlxalq ingilis dili olimpiadasıdır. Olimpiadanın məqsədi şagirdlərin ingilis dili biliklərini beynəlxalq qiymətləndirmə yanaşması ilə ölçmək, akademik özünəinamını artırmaq və sağlam rəqabət mühiti formalaşdırmaqdır.

Seçim turu HIPPO yolunun ilk mərhələsidir. İştirakçılar yaş, sinif və təhsil aldıqları məktəbin tədris dilinə uyğun kateqoriyada yarışırlar. Tapşırıqlar CEFR səviyyələri əsasında hazırlanır və imtahan Reading Comprehension və Use of English bölmələrindən ibarət olur.

• Olimpiadada 1–13-cü siniflərdə təhsil alan və yaş həddi 19-u keçməyən şagirdlər iştirak edə bilərlər.

• Kateqoriya şagirdin qeydiyyat zamanı təhsil aldığı sinfə əsasən müəyyən edilir.

• Aşağı sinifdə oxuyan şagird özünü hazır hesab edirsə, daha yuxarı kateqoriyada iştirak edə bilər; lakin yuxarı sinif şagirdi aşağı kateqoriyaya qeydiyyatdan keçə bilməz.

• Ad, soyad, doğum tarixi, sinif və məktəb məlumatları düzgün təqdim edilməlidir. Yanlış kateqoriya seçimi nəticənin ləğvinə səbəb ola bilər.

• Qeydiyyatın tamamlanması iştirakçının bu təlimatda göstərilən qaydaları qəbul etməsi deməkdir.

HIPPO imtahanı 12 kateqoriya üzrə keçirilir: 7 Regular və 5 Special kateqoriya. Kateqoriya seçimi şagirdin sinfi ilə yanaşı, məktəbdə ingilis dilinin tədris dili kimi istifadə səviyyəsinə əsaslanır.

Bu kateqoriyalar ingilis dilini xarici və ya ikinci dil kimi öyrənən, tədris proqramının əsas hissəsi ingilis dilində olmayan dövlət və özəl məktəb şagirdləri üçündür.

Special kateqoriyalar beynəlxalq və ya bilingv məktəblərdə oxuyan, məktəbdə fənlərin 50%-i və ya daha çoxu ingilis dilində tədris olunan, yaxud son 5 il ərzində ən azı 3 il ingilisdilli ölkədə yaşayıb təhsil almış şagirdlər üçündür.

Seçim turunun imtahanı iki ayrı bölmədən ibarətdir. Hər bölmə üzrə vaxt ayrıca hesablanır və nəzarətçinin göstərişi ilə başlanır.

• Hər iki bölmənin cavabları yalnız OMR — optik cavab vərəqində qeyd olunur.

• Sual kitabçasında işarələnmiş, lakin OMR vərəqinə köçürülməmiş cavablar qiymətləndirilmir.

• İmtahan materialları möhürlü saxlanılır və yalnız imtahan günü iştirakçıların qarşısında açılır.

• OMR vərəqində namizəd kodu və kateqoriya düzgün qeyd edilməlidir.

• Birdən çox cavab işarələnən və ya aydın oxunmayan cavab səhv hesab edilir.

hippo-thecontest.org/sample-papers/

Seçim turunun cavabları beynəlxalq qiymətləndirmə prosedurlarına uyğun yoxlanılır. Nəticələrin imtahandan sonra təxminən 2–3 həftə ərzində elan edilməsi nəzərdə tutulur. Dəqiq tarix rəsmi kanallarda bildiriləcək.

Bu yanaşma Gatehouse Awards və HIPPO-nun beynəlxalq qiymətləndirmə və imtahan təhlükəsizliyi prinsiplərinə uyğun tətbiq olunur. Qayda bütün iştirakçı ölkələr üçün eynidir və yerli təşkilatçı tərəfindən dəyişdirilə bilməz.

• Hər kateqoriya üzrə ən yüksək nəticə göstərən iştirakçıların təxminən 15–20%-i Milli Finala vəsiqə qazanır.

• Yekun keçid faizi, keçid balı və finalçı sayı iştirakçıların ümumi sayı, kateqoriyalar üzrə nəticə bölgüsü və beynəlxalq kvotaya əsasən HIPPO Beynəlxalq Komitəsi tərəfindən müəyyən edilir.

• Yalnız yüksək bal toplamaq avtomatik olaraq Milli Finala keçid zəmanəti vermir; seçim kateqoriya üzrə sıralama əsasında aparılır.

• Milli Finala keçən iştirakçıların siyahısı HIPPO Komitəsinin təsdiqindən sonra rəsmi şəkildə elan olunur.

• Milli Finalın imtahan formatı, tarixi, şəhəri və iştirak şərtləri ayrıca təlimatla təqdim ediləcək.

• Texniki uyğunsuzluqlar — ad, soyad, kateqoriya, nəticənin sistemdə görünməməsi və digər sistem xətaları üzrə müraciət qəbul edilə bilər.

• Sual kitabçası, düzgün cavablar, səhv cavablar və fərdi cavab analizi ilə bağlı məlumat təqdim edilmir.

• Rəsmi nəticə HIPPO sistemində və ya GOC tərəfindən təsdiqlənmiş siyahıda göstərilən nəticədir.

• İştirakçı şəxsiyyətini təsdiq edən sənədi və namizəd kodunu özü ilə gətirməlidir.

• İmtahan mərkəzinə rəsmi bildirişdə göstərilən vaxtdan gec olmayaraq gəlmək tələb olunur. Qapılar bağlandıqdan sonra iştirakçı imtahana buraxılmaya bilər.

• İştirakçı yalnız özü üçün ayrılmış zalda, masa və kateqoriyada imtahan verməlidir.

• Cavab vərəqini doldurmaq üçün qara və ya göy rəngli diyircəkli qələm gətirmək tövsiyə olunur.

• Mobil telefon, ağıllı saat, qulaqcıq, planşet və digər elektron cihazlar imtahan zalında istifadə edilə bilməz.

• Lüğət, tərcümə vasitəsi, qeyd dəftəri, köməkçi material, kalkulyator və digər əlavə resurslardan istifadə qadağandır.

• Başqa iştirakçı ilə danışmaq, cavab paylaşmaq, sual kitabçasını foto və ya video çəkmək ciddi qayda pozuntusudur.

• Nəzarətçinin bütün göstərişlərinə əməl edilməlidir.

• Bölmələr arasında sual kitabçası və cavab vərəqi nəzarətçinin göstərişi olmadan dəyişdirilə və ya açılıb-bağlana bilməz.

• İmtahan materialları zaldan çıxarıla bilməz. Sual və cavabların yaddaşdan paylaşılması da imtahan təhlükəsizliyi qaydalarının pozulması hesab olunur.

• Qayda pozuntusu aşkar olunduqda iştirakçının nəticəsi ləğv edilə və o, imtahandan uzaqlaşdırıla bilər.

• Ödənilmiş iştirak haqqı geri qaytarılmır.

• Tibbi arayışla təsdiqlənmiş sağlamlıq problemi və ya fövqəladə hal olduqda, təşkilatçının qərarı ilə ödəniş başqa GOC imtahanına keçirilə bilər.

• İştirakçının şəxsi səbəblərə görə imtahana gəlməməsi ödənişin geri qaytarılması üçün əsas hesab edilmir.

HIPPO Grand Final — İtaliya

HIPPO Olimpiadasının beynəlxalq final mərhələsi İtaliyada keçiriləcək. Milli Final və Regional Final mərhələlərində yüksək nəticə göstərən şagirdlər HIPPO Grand Finalda ödənişsiz iştirak hüququ əldə edəcəklər.

Final mərhələsində iştirakçılar dünyanın müxtəlif ölkələrindən gələn şagirdlərlə yarışacaq, ingilis dili biliklərini beynəlxalq səviyyədə nümayiş etdirəcək və zəngin akademik-mədəni təcrübə qazanacaqlar. Yüksək nəticə göstərən şagirdlər medal və beynəlxalq sertifikatlarla təltif olunacaqlar.